اسلام آباد۔12جولائی (اے پی پی):صدر مملکت ڈاکٹر عارف علوی عید الاضحٰی دے مبارخ تے پر مسرت موقع تے پوری پاکستانی قوم تے عالم اسلام کوں مبارخ ݙتی اے ۔ عید الاضحٰی دے موقع تے قوم دے ناویں آپݨے پیغام اچ انہاں آکھیے جو میں اللہ تعالیٰ دے حضور دعا کرینداں جو او پاکستانی قوم تے پوری ملت اسلامیہ دی عبادات، حج تے قربانیاں قبول فرماوے۔ صدر مملکت آکھیے عیدالاضحٰی اساکوں اللہ تعالیٰ دے حکم تے حضرت ابراہیمؑ تے حضرت اسماعیلؑ دی تسلیم ورضا دی یاد ݙویندی اے ، انہاں عظیم شخصیات کوں اللہ تعالی جݙاں امتحان توں گزاریا تاں ݙوہیں اللہ دے حکم کوں من ڳھدا ۔صدر مملکت آکھیے اللہ تعالیٰ کوں انہاں دا اے جذبہ اتنا پسند آیا جو اینکوں قیامت تئیں ایمان آلیں کیتے عبادت دی حیثیت نال لازم قرار ݙے ݙتا ، قربانی دی اے عبادت اللہ تعالی دی بارگاہ اچ مومن بندے دی طرفوں ایں عزم دا اظہار اے جو ایں دے رستے اچ وݙی توں وݙی قربانی تے ایثار کیتے او ہر ویلھے تیار اے ، انہاں آکھیے قربانی تے ایثار دا جذبہ عالمگیر اتے آفاقی تاثیر دا حامل اے، دنیا اچ کوئی قوم اوں ویلھے تئیں ترقی نی کرسڳدی جݙاں تئیں اوں وچ ایثار تے قربانی دا جذبہ موجود نہ ہووے۔ ڈاکٹر عارف علوی آکھیے قربانی صرف جانور کوہݨ دا ناں کائںی بلکہ ایندا اصل مقصد نفسانی خواہشات کوں اعلیٰ مقاصد دے حصول کیتے قربان کرݨا اے ، اے جذبہ انسان اچ ایجھی صلاحیت کوں جنم ݙیندے جیں دی بدولت او وݙی توں وݙی اوکھی صورت حال اچ وی راہ ِراست توں نی بھٹکدا۔
