اسلام آباد۔2اگست(اے پی پی) قومی اسمبلی فلسطینی عوام تےاسرائیلی ظلم و بربریت تے ایران اچ سابق فلسطینی وزیراعظم اسماعیل ہانیہ تے حملے دے نتیجے اچ انہاں دی شہادت تے شدید الفاظ اچ مذمت کریندے متفقہ قرارداد دی منظوری ݙتی اے جیں اچ مطالبہ کیتا ڳئے جو اقوام متحدہ دی سلامتی کونسل غزہ اچ جنگ بندی سانڳے موثر اقدامات کرے تاں جو فلسطینی عوام دے خلاف کیتی ونڄݨ آلی نسل کشی کوں روکیا ونڄ سڳے تے اسرائیل کوں ایندے جنگی جرائم اتے فلسطینیاں تے چاتے ونڄݨ آلے انسانیت سوز ظلم تے ولدا گھنے ۔ عالمی برادری اسرائیل دا ظلم و بربریت روکݨ تے فلسطینی عوام کوں انصاف ݙیوݨ سانڳے موثر اجتماعی اقدام کرے۔ قومی اسمبلی اچ ڈپٹی وزیراعظم و وزیر خارجہ محمد اسحق ڈار قرارداد پیش کریندے آکھیے فلسطینیاں تے اسرائیل دا ظلم ودھ ڳئن جیں پاروں ہݨ تئیں 40,000 توں ودھ نشوم جاناں ونڄئن جنہاں اچ تریمتاں تے ٻال وی شامل ہن۔ قومی اسمبلی اچ ساریاں پارلیمانی جماعتاں گزریل 9 مہینے توں فلسطینی عوام دے خلاف جاری اسرائیلی جبر و بربریت تے ھک مٹھ تھی تے کاوڑ کریندن ۔ قرارداد اچ آکھیا ڳئے جتھاں تہران اچ حماس دے رہنما اسماعیل ہانیہ دے قتل تے کاوڑ ودھی اے تے ایجھے واقعات فلسلطیناں دے خلاف جاری ظلم و بربریت روکݨ تے خطے اچ امن قائم کرݨ دیاں کوششاں کوں سبوتاژ کرݨ دی دانستہ سازش دے طور تے ݙٹھا ویندا پئے ۔ محمد اسحاق ڈار آکھیے اسرائیلی قیادت عالمی عدالت انصاف (ICJ) دے واضح فیصلیں اتے اقوام متحدہ دی جنرل اسمبلی دی قرارداداں، اقوام متحدہ دی سلامتی کونسل، اسلامی تعاون تنظیم (او آئی سی) دے واضح فیصلیں دے باوجود فلسطین دی آبادی کوں انہاں دی سرزمین توں بے دخل کرݨ تے تلی ہوئی اے اتے اقوام متحدہ دے سیکرٹری جنرل دی طرفوں چتاوݨی دے باوجود اسرائیل بے گناہ فلسطینیاں دے خلاف بلا امتیاز تشدد اتے حملے بند نی کیتے ۔ قرارداد اچ آکھیا ڳئے پاکستان دہشت گردی دی انھاں ساریاں شکلاں دی مذمت کریندے جنہاں اچ ماورائے عدالت قتل دے محرکات توں قطع نظر اتے خطے اچ ودھدی مہم جوئی تے گہری تشویش اے ۔ قرارداد اچ آکھیا ڳئے جو ایہو سویں واقعات نہ صرف دنیا دا امن تباہ کریندن بلکہ ایں توں عدم استحکام دا شکار خطے اچ ھک خطرناک کشیدگی کوں جنم ݙیندن تے امن دیاں کوششاں کوں ضیان پڄیندن ۔ اے ایوان فلسطین اچ اسرائیل دی طرفوں جاری ریاستی جبر و بربریت کوں امت مسلمہ اتے دنیا سانڳے ھک المیہ قرار ݙیندے ایندی شدید مذمت کریندے ۔ فلسطینی بھراویں تے بھیݨاں نال مکمل یکجہتی دا اظہار کریندےاتے اسماعیل ہانیہ دے گھر آلیں تے فلسطینی عوام نال تعزیت کریندے ۔ اقوام متحدہ دی سلامتی کونسل دی قرارداد 2735 (2024) موجب وختی جامع جنگ بندی، مصیبت زدہ فلسطینیاں کوں پائیدار تے بلا روک ٹوک انسانی امداد ݙیوݨ تے غزہ توں اسرائیلی قابض افواج دے وختی انخلا دا مطالبہ کریندے ۔ اے ایوان قرار ݙیندے پاکستان فلسطین کوں امداد ݙیوݨ جاری رکھیسی مظلوم فلسطینی بھراویں تے بھیݨاں کوں پاکستان اچ طبی علاج سودھے طبی امداد سانڳے موثر اقدامات کریسی۔ فلسطینی میڈیکل طلبا کوں انہاں دی تعلیم مکمل کرݨ سانڳے پاکستان دے میڈیکل کالجاں اچ مفت داخلہ ݙتا ویسی۔ اپݨے فلسطینی بھرا تے بھیݨاں نال اظہار یکجہتی دے طور تے 2 اگست کوں پورے پاکستان اچ سوڳ مناوݨ تے اسرائیلی بربریت دی واضح الفاظ اچ مذمت کرݨ دا فیصلہ کریندے ۔ قرارداد اچ آکھیا ڳئے جمعہ دے بعد پورے ملک اچ شہید اسماعیل ہانیہ دی غائبانہ نماز جنازہ پڑھݨ دا فیصلہ کریندے، اقوام متحدہ دی سلامتی کونسل توں مطالبہ کریندے جو او غزہ اچ جنگ بندی سانڳے موثر اقدامات کرے تاں جو فلسطیناں دی نسل کشی روکی ونڄ سڳےتے اسرائیل کوں ایندے جنگی جرم تے فلسطینیاں تے ظلم دا ولدا ڳھدا ونڄے ۔ قومی اسمبلی دا اے ایوان عالمی برادری توں مطالبہ کریندے او اسرائیل دے ظلم تے بربریت روکݨ تے فلسطینی عوام کوں انصاف ݙیوݨ سانڳے موثر اجتماعی اقدام کرے۔ قومی اسمبلی قرارداد دی اتفاق رائے نال منظوری ݙے ݙتی۔
.jpg)
