اسلام آباد۔29جولائی (اے پی پی) نائب وزیراعظم اتے وزیر خارجہ سینیٹر محمد اسحاق ڈار آکھیا جو پاکستان دولت مشترکہ نال رابطے، تعلیم اتے کلائمیٹ ریزیلینس دے ایجنڈے کوں ودھاوݨ بارے پرعزم اے۔ اے ڳالھیں انہاں سنوار کوں دولت مشترکہ دی سیکرٹری جنرل پیٹریشیا سکاٹ لینڈ نال ملاقات دے بعد سانجھی پریس کانفرنس توں خطاب کریندیں ہوئیں آکھی۔ انہاں آکھیا جو پاکستان 21 ویں صدی دے چیلنجز نال نبڑݨ کیتے دولت مشترکہ کوں مضبوط اتے جدید ٻݨاوݨ دی حمایت کیتے پرعزم رہݨ دے نال نال رکن ملکاں وچال کردار اداکریندارہسی۔
انہاں سیکرٹری جنرل دی تنظیم دی اقدار اتے مشن کوں ودھارا ݙیوݨ اتے نقطہ نظر کوں جدید ٻݨاوݨ اچ انہاں دے کردار دی تعریف کیتی۔ نائب وزیراعظم چھل دے بعد پاکستان دی مدد کرݨ دے علاوہ، تعلیم، نینگراں کوں بااختیار ٻݨاوݨ، صلاحیت سازی اتے کلائمیٹ ریزیلینس اچ تعاون کوں ودھاوݨ اچ انہاں دے کردار دی تعریف کیتی۔ نائب وزیراعظم آکھیا جو علاقائی رابطیاں دے ایجنڈے بارے پاکستان دا وژن دولت مشترکہ نال رَلدے۔ نائب وزیراعظم سینیٹر محمد اسحاق ڈار دولت مشترکہ دی سیکرٹری جنرل کوں ݙسیا جو وزیراعظم شہباز شریف اکتوبر اچ’ اپیا ساموآ ‘ اچ تھیوݨ آلے دولت مشترکہ دے سربراہان حکومت دے اجلاس اچ شرکت دے منتظر ہن۔
انہاں آکھیا جو ستمبر اچ دولت مشترکہ دے وزراء خارجہ دے اجلاس دے موقع تے او شریک ہم منصباں نال ڳالھ مہاڑ کریسن۔ ایں موقع تے سیکرٹری جنرل پیٹریشیا سکاٹ لینڈ پاکستان ولوں دولت مشترکہ دی مسلسل حمایت دی تعریف کیتی۔ انہاں آکھیا جو او 2022 دے تباہ کن چھل دے بعد پاکستان دا دورہ کریندی پئن تانجو او ݙیکھ سڳن جو پاکستان ولا کینویں اٹھ کھڑا تھیے جئیں 33 ملین توں ودھ پاکستانیاں کوں متاثر کیتا اتے انہاں اچوں 20 لکھ گھراں اتے روزگار توں محروم کر ݙتا۔
ہک سوال دے ولدے اچ نائب وزیراعظم اتے وزیر خارجہ سینیٹر محمد اسحاق ڈار آکھیا جو پاکستان ڳالھ مہاڑ نال امن اتے ترقی دی اقدار کوں برقرار رکھیندے بلکہ آزادی اتے خودمختاری دا احترام کریندے۔ انہاں سیکرٹری جنرل پیٹریشیا سکاٹ لینڈ دے 2030 تئیں انٹرا کامن ویلتھ تجارت کوں 2 ٹریلین ڈالر تئیں ودھاوݨ دے وژن دی وی تعریف کیتی۔ دولت مشترکہ دی سیکرٹری جنرل آکھیا جو دولت مشترکہ اچ 2.7 ارب افراد یا دنیا دا ہک تہائی حصہ شامل اے۔ دولت مشترکہ دی سیکرٹری جنرل پیٹریشیا سکاٹ لینڈ سرکاری دعوت تے پاکستان دا پنڄ ݙینھ دا دورہ کریندی پئن۔
.jpg)
