ڈیووس۔17جنوری (اے پی پی):نگران وزیراعظم انوارالحق کاکڑ آکھیے جو پاکستان بہترین محل وقوع دے لحاظ نال اہم تجارتی سنگم تے واقع ہے ، طرزحکمرانی بتدریج بہتر تھیندا پئے، حکومتی خرچے گھٹ کرݨ تے آمدنی ودھاوݨ ساݙا بنیادی مقصد اے، ٹیکس دے نظام اچ اصلاحات گھن آندے پیوں، ٹیکس وصولی ودھاوݨ تے آمدنی اچ ودھارے سانڳے نجی شعبے دی حوصلہ افزائی کیتی ویسی ۔ اے ڳالھ انہاں عالمی اقتصادی تعاون فورم دے دوران پاتھ فائنڈرز بریک فاسٹ دی تقریب اچ آکھی اے ۔ تقریب اچ معروف پاکستانی شخصیات دے نال پوری دنیا توں آئے دانشور، مصنفین، انسانی فلاح دیاں تنظیماں دے سربراہان شرکت کیتی۔نگران وزیراعظم انوارالحق کاکڑ آکھیے پاکستان 24 کروڑ دی آبادی رکھݨ آلا عظیم ملک اے جیڑھا جو آپݨے محل وقوع دے لحاظ نال اہم تجاری سنگم تے واقع اے ۔ پاکستان اپݨے محل وقوع دی بنیاد تے خطے اچ رابطے دا ذریعہ اے ۔قدرت پاکستان کوں بے پناہ نعمتاں نول نوازیے ۔ افغانستان وی ساݙا ہمسایہ اے جیں کوں اقبال ؒ ایشیا دا دل قرار ݙتا تے اتھاں استحکام دا پورے خطے تے اثر پوندے ۔ انہاں آکھیے جو پاکستان ای سی او دا وی اہم رکن اے ۔ ساݙے ہمسائے چین اچ 336ٹریلین ڈالر دی تجارت تھیندی پئی اے جݙاں جو اینکوں اڳوں خلیج تعاون کونسل دے ملکاں دی ہائیڈرو کاربن برآمدات انہاں دی معیشت کوں تکڑا بݨا ݙتے۔ انہاں کنے سرمائے دی بہتات اے لیکن انہاں دی آبادی گھٹ اے جیں دی وجہ توں انہاں کوں ٻاہرلے ملکاں توں افرادی قوت منگواوݨی پوندی اے ایں سانگے انہاں کوں پاکستان ، بنگلہ دیش اتے بھارت توں افرادی قوت میسر اے۔ پاکستان کوں صنعتکاری دےودھارے سانڳے زیادہ پرکشش اتے مسابقت دا حامل اتے سہولت ݙیوݨ آلے ملک دی حیثیت حاصل اے ۔ نگران وزیراعظم آکھیے چین اچ جدیدیت دا سفر 1979 دے بعد شروع تھیا تےاو آپݨی کجھ صنعتاں ٻئے ملکاں اچ منتقل کریندا پئے ایں سانڳے جنوب ایشیا مشرقی ایشیا دے نال پاکستان وی او ملک اے جتھاں اے صنعتاں لاتیاں ویسن ۔ وزیراعظم آکھیے پاکستان اچ مختلف نوعیت دے کلچر، زباناں ، نسلی گروپ اتے جغرافیہ موجود اے اتے دنیادی اٹھ توں نو بلند ترین چوٹیاں پاکستان اچ ہی واقع ہن ، اے کوہ پیمائی دی دلچسپی رکھݨ دے نال نال ساݙے کنے تھر و بلوچستان دے صحرا اتے پنجاب دا وسیع میدانی علاقہ وی اے۔ اے مختلف قسم دے محل وقوع داھک ایجھا مجموعہ اے جیں پاکستان کوں مثالی اہمیت داحامل ملک بݨایا ہویا اے ۔ 24 کروڑ آبادی اچوں 60 فیصد دی عمر 30 سال توں گھٹ عمر دے نینگراں دی اے تے اے پاکستان سانڳے ھک بھرپور توانائی دی حیثیت رکھیندن تے اینکوں رہنمائی دی لوڑھ اے ۔ تقریباً 15لکھ افرادی قوت آئی ٹی دے شعبے اچ کم کریندی پئی اے ۔ اساں نینگراں دی بین الاقوامی سطح تے ایکریڈیشن سانڳے وی کم کریندے پیوں تے اساں سالانہ بین الاقوامی سطح تے منیے ونڄݨ آلے سالانہ 50 ہزار نینگر گریجویٹ ݙے سڳدوں ۔
.jpg)
