اسلام آباد۔18مئی (اے پی پی):وزیراعظم شہباز شریف اسلامی جمہوریہ ایران دے نال ودھدے ہوئے تعاون دی اہمیت تے زور ݙیندے ہوئیں آکھیے توانائی دے منصوبے اتے سرحدی منڈیاں پاک ۔ ایران دوستی دی سربلندی دی علامت ہن، پاکستان ایران دے نال مختلف شعبیں اچ تعلقات دے ودھارے تے افغانستان سودھے خطے دی مشترکہ خوشحالی کوں ودھارا ݙیوݨ کیتے پرعزم اے ، ایران تے سعودی عرب دے درمیان تعلقات اچ پیشرفت علاقائی امن اتے خوشحالی کیتے اہم کردار ادا کریسی ۔ اے ڳالھ انہاں ایران دے خبر رساں ادارے اسلامک ریپبلک نیوز ایجنسی (اِرنا) کوں خصوصی انٹرویو اچ آکھی جیڑھا خمیس کوں چھپیے ۔ وزیراعظم آکھیے پاکستان اتے ایران گھاٹے مذہبی، ثقافتی اتے لسانی رشتیں اچ گھنڈیے پئن، ݙوہیں ملک دیاں حکومتاں آپݨے عوام دی بہتری تے سماجی و اقتصادی ترقی کیتے نیڑے تعاون کوں ودھارا ݙیندیاں پئن ۔ وزیراعظم آکھیے مند۔پشین بارڈر مارکیٹ اتے پولان ۔ گبد توانائی دے منصوبے مشترکہ عزم دے مظہر ہن۔ مند ۔ پشین سودھے سرحدی مارکیٹاں نہ صرف ساݙے سرحدی علاقیں دے سماجی و اقتصادی حالات کوں بہتر بݨیسن بلکہ مقامی کاروباراں کیتے نویں موقع کوں وی ودھارا ݙیسں ۔ اے مارکیٹاں ݙوہیں ملکاں وچال بالخصوص اقتصادی شعبہ اچ تعاون کوں اڳوں ودھیسن ۔ ھک سوال دے جواب اچ وزیراعظم آکھیے انہاں دا پختہ یقین اے جو ݙوطرفہ تجارت ھک ایجھا شعبہ اے جتھاں اساکوں آپݨی کوششاں کوں تکھا کرݨ تے آپݨی اجتماعی توانائیاں اتے وسائل کوں بروئے کار گھن آوݨا ہوسی ۔ انہاں آکھیے جو تجارتی صلاحیت کوں عملی جامہ پواوݨ کیتے اتھاں ٻہوں زیادہ گنجائش موجود اے، پاکستان تے ایران پنج ارب ڈالر سالانہ تجارتی حجم حاصل کرݨ کیتے پرعزم ہن۔ ایں سلسلے اچ بارڈر ٹریڈ میکنزم کوں فعال کرݨ اہم قدم اے ۔ سرحدی منڈیاں ساݙی تجارت کوں ودھارا تے ساݙی اقوام دی ترقی اچ اہم کردار اداکریسن ۔ انہاں آکھیے گزریل سال اگست اچ اسلام آباد اچ تھیوݨ آلے مشترکہ اقتصادی کمیشن دے 21 ویں اجلاس اچ ݙوہیں ملکاں خاطر خواہ پیشرفت کیتی، ایں رفتار کوں برقرار رکھݨ ضروری اے۔ وزیراعظم اپݨے ریمارکس اچ آکھیے جو ایں موقع تے ایران اتے سعودی عرب دی حکومتاں کوں سفارتی تعلقات دی بحالی تے مبارخ ݙینداں ۔ اے سنگ میل ایران اتے سعودی عرب دی قیادت دی دور اندیشی اتے چین دے قابل قدر کردار دا منہ ٻولیندا ثبوت اے ۔ انہاں آکھیے اساکوں یقین اے جو اساں پیشرفت علاقائی امن اتے خوشحالی کیتے اہم کردار ادا کریسی۔ وزیراعظم ایں ڳالھ تے خوشی دا اظہار کیتے جو ایران دی نیوز ایجنسی ”ارنا” اتے پاکستان دے قومی خبر رساں ادارے ”ایسوسی ایٹڈ پریس آف پاکستان (اے پی پی) ہݨے ہی میڈیا دے شعبہ اچ تعاون ودھاوݨ کیتے ھک معاہدے تے دستخط کیتن ۔ انہاں آکھیے ٹیلی ویژن، فلمز، سینما، ادبی اتے لسانی اداریں وچال تعاون ودھاوݨ کیتے ایں طرح دے کئی معاہدے زیر بحث ہن۔ اے معاہدے ساݙی ثقافت اتے روایات کوں حقیقی روشنی اچ پیش کرݨ اچ مدد ݙیسن تے ݙوہیں اقوام دے درمیان دوستی اتے یکجہتی دے رشتیں کوں مزید مضبوط بݨیسن ۔
