وزیراعظم محمد شہباز شریف نال بیلاروس دے وزیر اعظم دی ملاقات،مختلف شعبیاں اچ آپسی تعاون ودھاوݨ دی لوڑھ تے اتفاق
Islamabad: Prime Minister Muhammad Shehbaz Sharif meets with Prime Minister of Belarus H.E. Roman Golovchenko on the sidelines of Shanghai Cooperation Organisation Council of Heads of Government Meeting on October 15, 2024.
اسلام آباد۔15اکتوبر (اے پی پی) وزیراعظم محمد شہباز شریف نال بیلاروس دے وزیر اعظم رومان گولوف چینکو منگل کوں اسلام آباد اچ شنگھائی تعاون تنظیم دی کونسل آف ہیڈز آف گورنمنٹ (سی ایچ جی) اجلاس دے موقع تے ݙوپاسہ ملاقات کیتی جئیں اچ وزیراعظم شہبازشریف ݙوپاسہ تعلقات خصوصی طور تجارت، سرمایہ کاری، زرعی مشینری، سانجھے طور ٹریکٹرز ٻݨاوݨ اتے مواصلات دے شعبیاں اچ تعاون ودھاوݨ دی لوڑھ تے زور ݙتا۔ وزیراعظم آفس دے میڈیا ونگ توں جاری پریس ریلیز دے مطابق شنگھائی تعاون تنظیم دے اجلاس اچ بیلاروس دی شرکت دا خیرمقدم کریندیں ہوئیں وزیر اعظم شہباز شریف بیلاروس دا پوراݨ رکن ٻݨݨ تے مبارخ ݙتی اتے “شنگھائی اسپرٹ” کوں ودھاوݨ اچ بیلاروس نال رل تے کم کرݨ دے پاکستان دے عزم دا اعادہ کیتا۔ ایں سال جولائی دے شروع اچ آستانہ اچ صدر الیگزینڈر لوکاشینکو نال آپݨے نتیجہ خیز ملاقات دا ذکر کریندیں ہوئیں وزیراعظم آکھیا جو اعلیٰ سطح دی باقاعدہ ملاقاتاں ݙوہیں ملکاں وچال خوشگوار تعلقات کوں ہک مثبت رفتار ݙتی اے جئیں کوں برقرار رکھݨ دی لوڑھ اے۔ انہاں ݙوپاسہ تعلقات خصوصی طور تجارت، سرمایہ کاری، زرعی مشینری،سانجھے طور ٹریکٹرز دی تیاری اتے مواصلات دے شعبیاں اچ تعاون ودھاوݨ دی لوڑھ تے زور ݙتا۔ گولوف چینکو ایس سی او سربراہ اجلاس دے کامیاب انعقاد اتے ایندے مثبت نتیجے تے پاکستان کوں مبارخ ݙتی۔ انہاں پاکستان اچ شاندار میزبانی تے وزیراعظم شہباز شریف دا شکریہ ادا کیتا۔ انہاں یقین ݙوایا جو بیلاروس شنگھائی تعاون تنظیم دے مقاصد، اصولاں اتے ترجیحات کوں ودھاوݨ کیتے اتے پاکستان دی شنگھائی تعاون تنظیم دی کونسل آف ہیڈز آف گورنمنٹ دی چیئر دی حیثیت نال پاکستان نال تعاون کریسی۔ گولوف چینکو ݙوہیں ملکاں وچال ݙوپاسہ تعلقات دی مثبت سمت تے اطمینان کیتا اتے سانجھی کوششاں نال مفاد دے شعبیاں اچ آپسی فیدہ مند تعاون کوں بیا مستحکم کرݨ دی خواہش کیتی۔
